Scritto da Pietro Rega | 08 Maggio 2009
Posted in La Cultura Campana - Musica Napoletana

'E CERASE

di Di Giacomo

Testo:

ABBRILE, abbrile ! Mmiez' 'e ffronne 'e rosa
vaco vennenno 'o frutto 'e chisto mese;
cacciate a capa, femmene cianciose,
io donco 'a voce e vuie facite 'a stesa
“Frutto nuviello e mese 'e paraviso !
Collera ncuorpo a nuie nun ce ne trase !”

'E ccerase ! ... 'E ccerase ! …

L'anno passato, 'o tiempo d' 'e cerase,
facevo 'ammore cu na Purticesa,
abbascio 'o Granatiello steva 'e casa,
e 'a chiammaveno Rosa 'a vrucculosa.
Belli tiempe de lacreme e de vase ! ...
Ogne lacrema quanto a na cerasa !
Ogni cinche minutele nu vaso ! ...

'E ccerase!... 'E ccerase!...

Mo c' aggia fa'? Se so' cagnate 'e ccose,
e m'ha licenziato, chella 'mpesa !
E arrivato nu legno genovese,
e 'o capitano ha ditto ca s' 'a sposa...
Capitano d' 'o legno genovese,
addò t' 'a puorte 'a bella Purticesa ?

'E cerase!... 'E cerase!...
Cacciate 'a capa, femmene ciancione;
io dongo 'a voce e vuie facite 'a stesa
`E ccerase!... `E ccerase!... Abbrile è 'o mese
c' uno se scorda meliune 'e cose...
Capitano d' 'o legno genovese,
a me non me ne mporta ca t' 'a spose;
mme daie na voce a n' ato pare 'e mise! ...

`E ccerase !... 'E ccerase